【Now財經台】泡泡瑪特(09992)中午出咗業績,去年收入微升,但純利大跌44%,主要係經銷開支增逾30%,一般及行政開支都升咗逾20%,表現係咪麻麻?因為自主產品佔比愈嚟愈大,IP授權及設計成本都上升,集團指,今年會繼續擴大IP庫,似乎今年成本都好難顯著下降?
博威環球資產管理金融首席分析師聶振邦指,泡泡瑪特開支喺上年疫情期間有增無減,收入要有大突破先見到出路,內地今年經濟增長目標定喺約5%,有機會帶旺泡泡瑪特呢類零售業,雖然內地以外市場收入倍升,但佔整體不足10%,所以業績表現仍取決於內地表現。不過,雖然盲盒銷售方式可引發熱潮,但內地監管部門亦規範銷售,集團管理層或要考慮轉型。
聶Sir又話,持續出新IP令授權及設計成本上升,保住舊有IP知識產權之餘,可能又要付費,開支只會愈來愈大,管理層必須提出新業務方向,才可令市場重拾對公司前景嘅信心。