【Now財經台】華潤醫藥(03320)中午放榜後跌勢加劇，不斷刷新日內低位，同大市走勢背馳，一度急挫逾11%，低見6.42元。
被視為老牌藥股嘅潤藥，業務涵蓋製藥及生產保健品、醫藥分銷以及藥品零售，其中以醫藥分銷業務佔整體收入高達80%。
集團去年多賺10%至逾41億元，末期派息增6%至16仙，但收入及純利按年增速較上半年顯著放緩，整體毛利率亦較中期業績輕微收窄至15.4%。
截至噚日止，潤藥股價今年累升14%，恒生醫療保健指數同期跌6%，潤藥明顯跑贏，不過，由於去年業績冇乜驚喜，資金喺放榜後急散水，暫時係今日恒生醫療保健指數跌幅最大嘅成分股，潤藥今日低位逼近上升通道支持線， 即6.4元水平。
集團喺業績報告提及，已加快創新轉型，研發更多「生物新藥」， 並提升毛利率較高嘅製藥業務收入佔比，投資者可留意毛利率未來係咪會回升。
