【Now財經台】醫藥外包股康龍化成(03759)噚晚公布去年業績後，今朝AH股齊大跌，H股低開4%後，沽盤湧現，不斷刷新日內低位，一度重挫逾19%，低見32.25元，錄得2019年上市以來最大單日跌幅，其後繼續喺低位徘徊。
康龍化成去年收入按年升逾37%，純利就一如盈警預測跌17%，末期息按年大減33%，雖然集團宣布「10送5」紅股，但股價今朝照急插水，可能同噚晚公司披露將有股東減持有關。
據聯交所上嘅通告，實際控制人及其一致行動人士擬於4月28日至9月28日期間，透過大宗交易或集中競價方式減持最多2.1%總股本。公司解釋，減持行動係員工股權激勵計劃，減持人士包括公司合夥人，都係長期有貢獻嘅老臣子。
此外，兩名主要股東亦因自身資金需要，計劃年底或之前減持合共不逾6%總股本。其實去年8月，兩人已減持過6%總股本，今次再有沽貨行動，即時推冧股價，下個重要支持位要睇實去年10月嘅52周低位，即25.85元。
