【Now財經台】截至早上11時止，1小時內《彭博》用戶關注度上升最多港股，依次為中銀香港(02388)、騰訊控股(00700)、比亞迪股份(01211)、旭輝控股集團(00884)及金沙中國(01928)。
上日有多隻大型內銀股出業績，成績表各有好壞，本地代表中銀股價係績後表現最差，一度挫6%，低見23.8元，之後跌幅收窄至逾3%，半日收報24.45元。
大華繼顯執行董事梁偉源表示，中銀盈利增長差過市場預期，除咗淨息差擴闊幅度唔及同業，亦受一次性開支及部分投資產品減值影響，但佢對中銀股價跌到咁感到意外，因為業績算交到功課，派息亦有增長，而隨著今年金融市場回穩，甚至反彈，相信投資產品減值會被撥回，唔會再拖累盤數。
Steven續指，中銀股價今朝一度跌穿24元，已經好接近去年10月低位23.55元，認為股份已經超賣，加上股價大跌後股息率仍有5厘以上，依家反而係買入嘅好時機。
