【Now財經台】截至早上11點止，1小時內《彭博》用戶關注度上升最多港股，依次為騰訊控股(00700)、中國海洋石油(00883)、永利澳門(01128)、銀河娛樂(00027)、碧桂園(02007)。
金沙中國(01928)上周五上榜後，今日輪到永利及銀娛上榜，澳門日前出咗3月博彩收入數據，係3年以來最多，按年大升逾2倍，澳門賭業似乎終於走出疫情困局，今朝賭股明顯跑贏大市，其中，永利股價技術上重上50天線，連同銀娛股價齊見近兩個月高位，今輪升勢係咪可以持續？
富昌證券聯席董事譚朗蔚指，長假期、節日都會為市場帶嚟憧憬，嚟緊有復活節、「五．一」長假期，短炒呢啲消息都不為過。睇返最新出爐嘅賭收數據，按年係好靚仔，始終舊年3月疫情仍然好反覆，依家通咗關，多返遊客，賭業自然旺返，但唔可以話有爆炸性增長，相信澳門賭業係慢慢復甦緊。
佢又話，金沙、永利及銀娛股價喺去年11月、12月彈咗唔少，永利更加倍升，雖然業績期過咗，但啱啱出嘅數據都唔錯，想部署濠賭股，建議投資者集中睇返金沙及銀娛呢類龍頭，因為佢哋嘅恢復能力較好，銀娛短線睇56元水平，突破到再上望60元。
