【Now財經台】異動股匯聚科技(01729)午後升幅擴大，一度大升逾20%，高見2.26元，衝上逾7個月高位，成交十分誇張，暫時成交股數已經係近1年最多，亦較過去100日同時段平均大增16倍。
集團曾喺中期業績提及，5G電訊係發展策略之一，而近幾個月電訊、電訊設備及5G相關股都借AI概念炒上，不過，匯聚股價喺過去半年只係區間上落，不排除借呢輪炒作進一步推高股價。
匯聚今日喺大成交下突破，但高位回套壓力好大，14天RSI已升至76嘅超賣水平，後市要留意守唔守得住1.9元水平，如果守得住，上落區間有望向上移，若失守可能又要再落返之前嘅區間上落。
