【Now財經台】摩根士丹利最新上調3隻國企物管股目標價，包括華潤萬象生活(01209)、中海物業(02669)、保利物業(06049)，但同時下調多隻民企物管股目標價。
以前成日話物管股少借貸，現金流充裕，但大摩提到，舊年物管股整體現金流有惡化，反而睇好國企物管股，因為呢啲公司盈利增長強勁及有健康現金流。
寶鉅證券董事及首席投資總監黃敏碩認同報告，指大摩預測2022年至2025年，國企與民企物管盈利年均複合增長率分別有26%及7%，可謂相差甚遠，而民企物管冇國企內房做「奶媽」，認為中長期會面對更大減值撥備風險。
不過，Michael亦指，其實佢更睇好資產背景強，負債水平較低嘅內房股。佢舉例分析，華潤萬象估值較高，預測市盈率(PE)約30倍，股息率唔夠2厘，反而不及母企華潤置地(01109)值博，潤地PE約8倍，息率4厘，仲可以炒淨資產值同股價折讓呢個因素。
