【now.com財經】今朝揀咗隻恒指熊(55502)出嚟，計劃一係指數喺低位回升返到保歷加中軸時唔過就出，再唔係安全嘅見Slow STC(14,3)兩線上返超買見觸頂時出。
喺今朝10點45分，五分鐘圖指數同Slow STC(14,3)兩樣已經出現咗觸底，不過指數去返保歷加中軸之後就一下子向上飆高上去，完全唔見有阻力嘅成份，唯有退至用安全方法搵位出動。
指數上過保歷加中軸後有見受制於250分鐘線(五分鐘圖50線)，指數出現橫行嘅同時，Slow STC(14,3)兩線亦於超買位橫行住，未見觸頂。等到11點50分，終於都見Slow STC(14,3)嘅%K線向下跌穿%D線。吼呢個位出(55502)嘅話，如常的用10分鐘作為落場時間，按期內(55502)高低位做過0.048元/0.047元，平均買入價為0.0475元。落完場之後，剛好打鐘放Break。
今朝喺【輪證贏家】時提過恒指喺日線圖上做緊第二款圖形出嚟。其實有留意到呢個專欄嘅話，應該記得之前3月時有講過指數喺日線圖上就係用咗一整個3月份行出「圓底」圖形，但踩入4月份之後，先係有復活節同清明節假期令到個市有啲呆滯，假期後返嚟見到市場上亦未有利好/利淡消息出現，市況仍然橫行著，慢慢喺日線圖上由「圓底」變成「杯柄」，杯身仍然用返3月份做出嚟嘅「圓底」，而隻柄就係4月份至今嘅「小長方形」。「杯柄」嘅柄可以係「小長方形」、「小圓底」甚至係「小三角形」都得。假如後市恒指可以上破得到呢個「杯柄」頸線的話，其實都係用返3月份嘅「圓底」嘅尖尖位同頸線做量度升幅，只不過多出個「柄」，成件事好似多咗份誠意。
到咁下半場開市之後，指數有見向下再衝落多幾十點，不過保歷加通道口見收窄中，所以指數落咗一浸之後都未見再瀡落去，唯有等保歷加通道口再拓闊先走隻(55502)啦，反正作戰室今日上半場先淡後好兩注都食晒，下晝有無嘢再落袋都只係Bonus，Set定以上破返中軸做止蝕位啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
