【Now財經台】半導體股ASMPT(00522)今朝開市前出咗季績，表現差過預期，股價今朝低開後，跌幅不斷擴大，一度重挫近13%。集團首季少賺近62%，銷售收入、毛利率及新定單全部都要跌，不過，全球半導體市場上季都好疲弱，台積電及南韓SK海力士季績都麻麻，ASMPT業績係咪都差得有道理？
博威環球資產管理金融首席分析師聶振邦指，反差其實都比較大，ASMPT首季盈利大跌近62%，去年同期就增長逾50%，睇返往績，集團過往第1季表現都唔錯，上季突然走弱，對市場嚟講係會略為失望。
股價方面，聶Sir話，ASMPT舊手11月至今年3月期間，有3個月都有得升，依家已經超買，所以一旦有略為負面嘅消息出現，股價就會跌得比較多，但佢認為ASMPT今日大跌，可能純粹因為市場一時間未能評估到業績表現，導致沽壓比較明顯。
