【Now財經台】微盟(02013)今日開市時接近平開，早段升幅都唔算好顯著，但臨近中午股價同成交就出現異動，午後升幅進一步擴大，最多升超過14%，高見4.2元。
微盟上星期四收市後公布的首季經營數據理想，但上日股價走勢高開低走未能炒起，今日先有反應。
富瑞指微盟第一季業績有驚喜，SaaS訂單量升約20%，廣告收入就大增58%。另外微盟通告提到潛在回購可轉債和股份，其實微盟喺過去兩年都有回購過，但撐唔起股價，反而越買越跌，回購對微盟似乎冇托價作用，建議投資者如果對回購有憧憬，就要小心公布回購消息後「見光死」。
技術方面，暫時未見到明確「買入」訊號，微盟股價上日仲創今年低位。雖然今日反彈收復10天及20天線，相信主要係因為跟住成版科網股炒上，未來要睇微盟係咪能夠跟住騰訊生態圈而炒上。
