【Now財經台】截至早上11時止，1小時內《彭博》用戶關注度上升最多港股，依次為騰訊控股(00700)、碧桂園(02007)、美團(03690)、龍湖集團(00960)及中國海洋石油(00883)。
科指上周累升逾3%，扭轉連跌8周嘅劣勢，但今日反覆向下重返弱勢，個股方面，美團更逆市跌，美團其實仲未上返早前失守1支大陰燭，即125元嘅關鍵水平，美團後市會點走？
富昌證券聯席董事譚朗蔚指，恒指上周升約700點時，過去一直偏軟嘅美團、京東集團(09618)及其他科技股升得最勁，由於超弱、超悲觀嘅市況導致指數超賣，有指股價反彈似係夾淡倉，但佢認為可信性較低，不論恒指或美團，相信3月中低位有機會係第1度阻力。佢又話，要睇港股係咪真係有轉機，除咗ATM要行，較強勢嘅股份如「中特估」概念股、中國移動(00941)及滙豐控股(00005)都肯行，大市先至係真正見底。
Stevan又指，如果美團清晒5月第1支大陰燭，就可以視為過咗一個大難關，若可以企穩3月中嘅底部，先有脫險嘅把握，而恒指就要企穩3月低位，即19000點水平，先可以叫做穩陣。
