【now.com財經】噚日罕有地向個股發展，睇開呢個欄嘅都知我好日都唔同個股玩，皆因個人懶，要我睇咁多夎隻個股慢慢搵，倒不如一條恒指走天涯；但無奈指數呢期實在太廢，焗住逐隻睇，星期二(6月5日)本來喺YT推隻滙控(00005)好倉，不過最後無推到，事隔一日覺得有啲唔對錯，拉拉線、畫畫圖之下見到滙控又嚟到魔咒60蚊附近呢個位，計落四頂不破之後，揀咗隻滙豐熊(52940)出嚟，等到噚日下半場見指數忽然抽高時落場，平均買入價為0.0495元，再用返「平常心」，即係等返條Slow STC(14,3)落返去超賣，當Swing一趟後離場。
指數高衝過後果然無乜嘢睇，三兩下手勢又回返落去見紅，連帶隻大象都落返去58蚊呢個位左右，五分鐘圖上見Slow STC(14,3)兩線亦快速回落去超賣水平，以噚日Patreon出文時間1點51分，on top如常的比10分鐘作為睇文時間的話，即2點10分再睇返隻象，五分鐘圖上已經見到Slow STC(14,3)兩線已經重返超賣至嚴重超賣水平。呢一注都真係極速都無朋友，按2點至2點10分期間(52940)都係做過0.051元，極短線超高速嘅一趟平均有1.5格或3.03%，和咗個手績費然後當無事發生。
今朝早終於都見返個太陽，不過天文台話呢幾日都仍然有驟雨同雷暴；恒指都少少放晴，開市先升34點，報19333點。以呢口開市價計，指數再次踩番入熊證第一層街貨19300至19399點，係呀，呢層又翻生啦，今日先至復活架咋；重貨區仍見19600至19699點，開始肥返見有993張期指街貨。至於牛證方面，都見到街貨層進一步推高至19000至19099點，重貨區都有肥到，見返有過千張期指街貨，上到有相當於1126張期指，不過講緊呢度係18500至18599點，同現價有差不多800點左右距離。
本以為指數喺開市後向上衝去殺重熊，結果到依家9點43分見到嘅係高開低走，反方向下行至見指數出現倒跌嘅情況；出面嗰天都開始暗返，行雷嚇一嚇我家肥貓唔敢食嘢。
恒指其實嚟到依家呢個位有少少尷尬，事關今朝開升後，喺小時圖上見指數再次重上10小時線之上，但還記得早幾日指數喺小時圖被10/150線夾住嘅情況嘛？呢個情況又出現啦。望望鐘仲有8分鐘到10點，反正作戰室第一注偷位淡倉都見戰友爬完格仔，為今日第一注取得正數，就等埋呢8分鐘再睇下個小時圖點搞。
終於等到10點，小時圖見指數仍然處於10/150小時線之間，而兩線嘅高度目前見只有136點，窄幅橫行似係今日指數嘅走勢。
換返個五分鐘圖見目前指數靠近返保歷加通道中軸，蓋整條保歷加通道仍然呈上，而指數亦算是仍靠近熊證街貨層；再加上日線圖上見指數(暫時)企返上中軸以上水平，心底裡開住隻好倉出嚟先。恒指牛(66258)，收回價18980點，同現價有約370點距離，槓桿有約43.98倍都已經夠做Day Trade，進取嘅用五分鐘圖見指數靠近保歷加中軸有支持後可以小注出動；安全嘅，如常的用返Slow STC(14,3)做Swing Tarde，即等超賣時先至出好倉。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
