【Now財經台】截至早上11時止，1小時內《彭博》用戶關注度上升最多港股，依次為比亞迪股份(01211)、碧桂園(02007)、美團(03690)、友邦保險(01299)及中國平安(02318)。
噚日收市後，商務部話會有政策谷汽車消費，包括下半年會揀100個城市，搞新能源汽車促銷活動，並聯同地方、企業、行業協會推出支持政策，又鼓勵銀行推出汽車信貸。不過，今日成個板塊暫時都冇乜反應，喺中央力谷下，對推動內地汽車銷售嘅作用有幾大？
大華繼顯執行董事梁偉源指，今次可以話係政策大晒冷，可以做嘅已經講晒出嚟，其實去年底至今年初都keep住有政推出，但外界都睇到內地汽車需求其實冇咁大。
Steven又指，年初爆發車企減價戰後，銷售未見明顯改善，加上嚟緊有唔少車企出新車，市場競爭一定會加劇，因此，佢認為政策未必可以扭轉整個行業嘅局面，加上經濟唔係太理想，政策只能喺去庫存方面有少少幫助。
