【Now財經台】中興通訊(00763)股價今朝輕微高開0.7%後，升幅迅速擴大，其後升幅一度擴大至逾8%，高見27.8元，衝上22個月高位，成交金額逾3億元，成交量較過去100日同時段平均增逾3倍。
雖然全球手機需求仍未見到復甦勢頭，但中興股價強勢，今朝更大幅跑贏3大中資電訊股，內地預期，年內立法制訂全國首個《人工智能法》，中興率先搶佔開源陣地，相信喺AI發展規範方面有一定影響力。
中興股價連升第2日，今個月大部分時間企穩所有主要移動平均線之上，走勢偏強，A股今朝一度升5%，同H股齊齊衝上22個月高位，如果參考自3月每日成交顯著增加時，劃出嘅股價上升阻力線，推算中興有機會升至30元水平，但14天RSI最新已升至近75嘅超買水平，由於集團未有具體嘅AI訊息發布，小心炒完呢浸AI概念後，中興股價會借勢調整。
