【Now財經台】在內地經營網上藥房、提供在線醫療服務，以及健康管理服務嘅叮噹健康(09886)，今朝成交急升，股價高開約1%後，升幅一度擴大至21%，高見3.27元。
日前集團旗下叮噹快藥同內地製藥公司日健中外製藥達成戰略合作協議，聚焦慢性病領域開展深度合作，意味叮噹正式開始建立心絞痛疾病中心。
叮噹健康去年9月上市後，曾企穩上市價12元水平一段時間，但今年2月開始股價不斷尋底，上月更見過上市新低2.14元，大股東喺3月中指，自動延長禁售期多半年至9月13日，但對股價支持作用唔大。
早前，有消息指，集團會探索用AI、5G、物聯網、雲計算等科技提升營運效率，可以觀望集團有冇進一步消息刺激市場對股份嘅興趣及憧憬。
