【now.com財經】望望月曆，原來仲有幾日2023年就過咗一半，恒指由年初大約19,781點開始上行，用咗大約一個月時間上到年內暫時高位22,700點後，再用咗五個月時間向下回落返去依家18,7XX點附近，計落上半場暫時指數累跌1,000點左右，但如果喺1月尾見指數重上22,000點樓上而衝咗入去到依家嘅...可能祈求緊7月會見翻身；不過，今年5月比6月更窮更絕，真係唔知7翻身會唔會出現。
嘿，7月未到恒指今日開市終於見綠燈，升57點，開市報18,851點。到正式開市之後，恒指一度高衝至18,929點，但嚟到依家9點38分，指數升幅稍回至升106點，報18,900點。
「想問日線圖噚日嗰粒，當唔當到係『倒轉鎚頭』？」作戰室戰友提出嘅問題，其他戰友睇過都話應該當佢係，我當然都有睇過，噚日粒燭形態上同「倒轉鎚頭」的確相似，唯一要挑剔嘅係有少少下影線，嗯...如果當教科書式嘅「倒轉鎚頭」係100%功率的話，咁你打個八折比佢啦。
但係，就算打個八折比佢，恒指今日見久違了嘅升幅，仲要係有啲力水咁，依家9點55分，恒指升294點，報19,088點，雖然對熊證街貨未有絲毫損傷，但係指數推返上19,000點以上而如果企得穩得話，再睇埋星期四(6月29日)期結，呢個期結唔止係第二季期結，仲要係半年結嘅期結，傳統期結日指數係表現得好少少嘅，恒指重新爬返上日線圖中軸以上都未必無可能。
依家10點3分，指數衝高咗半個鐘頭之後，喺五分鐘圖上見高位「十字星」，作戰室好倉率先離場，而小時圖上見指數重上中軸以上水平，而Slow STC(14,3)兩線亦出現觸底，不過，保歷加通道口收窄中，限制住指數再上嘅空間；當然，喺有限嘅空間之下再上，係絕對可以嘅。
再嚟到10點10分，五分鐘圖上見「十字星」出完之後，指數仍然定住喺高位位置，似乎係等緊10線上嚟接住指數再上，進取嘅踩住10線再去而偷位出好倉唔反對；安全嘅當然可以等返Slow STC(14,3)回返落去超賣位先至出手，當行一趟Swing Trade都係可以嘅。
恒指牛(66027)，收回價18,650點，同現價有逾420點距離，槓桿有約39.74倍亦夠做Day Trade。恒指結束五連跌係好睇，但好睇還好睇，今日一彈唔代表佢轉勢。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
