【now.com財經】噚日揀咗隻恒指牛(66027)出嚟，改一改進取嘅如果見五分鐘圖20線有支持就偷位出動。以噚日Patreon出文時間為1點14分計，on top如常的用10分鐘作為睇文的話，則1點24分再睇返恒指走勢圖，指數開始向10/20線方向壓落去。及至1點35分，見指數向下穿過中軸後即縮，只係留低咗條下影線出嚟，反映到中軸見支持。偷呢個位出(66027)可以，如常的用10分鐘作為買入時間的話，則按1點35分至1點45分，(66027)高低位做過0.054元/0.048元，平均買入價為0.051元。
指數其後緩緩再上，慢唔緊要，方向啱就可以啦，而同步亦都小心Slow STC(14,3)嘅走勢，Slow STC(14,3)比較常見同「合理」地出超買再超買，往往都會見到保歷加通道口同步闊，但亦都有時侯見整條保歷加向上/下時，Slow STC(14,3)都會出到超買再超買/相反，咁係因為指數方向無變，指數仍然沿保歷加方向運行同時而壓住Slow STC(14,3)啫，所以隨時都要提醒自己指數同Slow STC(14,3)係隨時都可以忽然出現觸頂/底，如見，手上嘅貨當然係先走為上。
2點打後指數上到差不多19,200點前見橫行，再到2點45分，Slow STC(14,3)嘅%K線高位向下低走於%D線，再過多五分鐘，仲開始離開超買範圍，即(66027)亦都係時侯走人。如常的用10分鐘作為走貨時間嘅話，按2點50分至3點期間，(66027)高低位做過0.06元/0.058元計，平均走貨價為0.059元。換言之短短嘅呢一趟平均有8格/15.69%賺幅落袋。
聽日就係月期+季結+半年結，噚日恒指抽返上354點之後，今日返嚟見牛熊證兩邊街貨都有番啲空間去出新貨，同步開始扭轉咗恒指同牛熊街貨嘅擺位，再唔係死靠住牛證街貨嘅同時熊證隔九條街咁遠，今日見到嘅係熊證最貼價落到去19,200至19,299點，而牛證都生返少少毛見18,800至18,899點一層新貨。兩邊嘅新增街貨層嘅貨量雖然唔多，但如前文所指，意義上將牛熊距離拉返近，唔會再被恒指撳住一邊嚟打，出現日線圖單邊市情況。
今朝指數低開48點，開市報19,099點，到依家9點50分，恒指跌幅一度擴闊，不過嚟到依家喺五分鐘圖上見佢開始出現「長方形」，連帶保歷通道頂線都見向下，開市無耐就慢行，唔緊要，都係嗰句：方向啱我慢你龜速呀！ (輪會怕啲嘅，因為有時間值問題)換上小時圖見噚日指數上到保歷加頂線+小時圖150線後，今日指數向下亦見Slow STC(14,3)同步下行，係嘅，連保歷加通道都保持橫行嘅時侯，指數同Slow STC(14,3)行Swing亦都合理。關鍵係如果佢穿得過埋條中軸的話，大膽少少博Slow STC(14,3)落返去超賣都可以。
恒指熊(67696)，收回價19,500點，同現價有逾410點差距，同一收回價中槓桿最高，有約37.43倍，安全啲睇埋小時圖10線佢穿唔穿得過先再出手啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
