【Now財經台】佐丹奴國際(00709)股價今早輕微高開，不久就倒跌，但集團中午發盈喜，股價午後隨即大幅抽高，最終以接近4年高位2.76元收市，大升9.5%，連升7日，全日成交金額近3000萬元，係近4個月最大單日成交，亦較過去100日同時段平均大增逾4倍。
佐丹奴預期，上半年按年多賺75%至1倍，純利介乎1.7億至2億元，主要受惠於銷售改善、毛利率提升及控制經營開支。
佐丹奴股價今日以全日高位收市，成交亦配合升勢，反映股價上升勢頭仲未結束，雖然14天RSI已升至80嘅嚴重超買水平，但今年幾次上到呢個水平，股價回穩後，好快又升過，如果對佐丹奴有興趣，不妨等股價調整時再買貨，始終6月至今已累升咗近30%。
