【Now財經台】九龍倉置業(01997)上半年轉賺18億元，惟基礎盈利倒退9%，中期息減4%至67仙。九置股價噚日收市已跌5%，今日出咗業績後，股價插穿近月約38元嘅支持位，一度急插7%，跌至36.25元嘅逾半年低位。
艾德金融聯席董事陳政深分析指，技術上九置已跌穿下降通道，係利淡訊號，出完業績又冇特別消息，除非股價短期內重上38元，否則，後市會繼續下跌。
今次份業績可以扭虧為盈，歸功於投資物業重估虧損由55億元大幅收窄至11億元，不過，Ryan認為九置虧損未見底，喺高息環境下物業價格將會持續向下，相信直至美國開始減息及經濟回穩，虧損情況先會見明顯改善。
Ryan又話，即使有上年同期嘅低基數，九置旗下商場業務嘅收入同盈利僅錄得介乎高單位數至低雙位數增長，唔符合市場預期嘅顯著增長。對比同業，旗下商場喺周末假日好旺場，佢話九置今次份業績都唔可以全部歸咎於市道差。
