【now.com財經】噚日確實悶死，指數低開高走後，幾近以橫行嚟行到4點，中間就算出Swing Trade方法去玩，拉到盡保歷加頂至線底大部份時間都係得百零點，作戰室都唯有改變策略，一係用上再高啲槓桿嘅牛熊，一係就專心工作。但就算玩Swing Trade，都真係少啲耐性都搞唔掂。
今朝起身見美股隔晚彈高成400幾點，應該今日恒指都會郁下掛。依家9點6分，U盤行緊就睇下個街貨圖先。今日見熊證有三層新增街貨層，最貼價落去到19600至19699點，不過街貨量就唔多。上多層19,900至19,999點就有相當於911張期指，呢度就重貨區啦。
至於牛證最貼價見19,300至19,399點，有相當於815張期指喺度，屬第二重貨區。重貨區仍然駐守於19,000至19,099點，有相當於1,456張期指。
如果以恒指噚日收市價計，指數仍然靠近上方熊證街貨；但今朝開市之後，指數向下再落多229點，報19,308點，一嘢將指數由近熊打落去近牛，仲將牛證第一層嘅第二重貨區打到得返8點生命值，唔駛諗，開市後呢8點都應該會無埋。
依家9點40分，我家肥貓又準備瞓覺，恒指暫時都似有跌定嘅情況，指數低開後再低走，暫時最低見過19,185點，跌逾300點，依家跌幅略為收窄至跌304點，報19,232點。莫講話19,300至19,399點嘅肥牛，連第二層19,200至19,299點嘅都食埋，Total今朝指數吞咗相當於1,285張期指街貨。
換個日線圖見今日指數再向下落到中軸以下水平，不過，Slow STC(14,3)兩線回落到目前見到嘅中軸後，暫時未見勢頭向下，只係橫行嘅情況，唔通Slow STC(14,3)唔打算再扯指數向下再殺近牛？
至於噚日入咗Watch List嘅友邦(01299)，依家9點50分見佢隨大市出裂口向下，日線圖見保歷加通道口拓闊，比位Slow STC(14,3)出超賣再超賣，所以都係放埋一二邊先(當然你係可以出淡倉追佢個保歷加通道口拓闊+Slow STC(14,3)出超賣再超賣)。
至於恒指方面，嚟到依家9點54分，Slow STC(14,3)兩線都已經回落到超賣水平，不過，目前保歷加通道口由今朝見嘅拓闊開始慢慢有轉向收窄，作戰室第一注淡倉爬格仔應該都爬晒，進取嘅出好倉博指數同Slow STC(14,3)出觸底向上，皆因稍後時間保歷加通道將會整條變成平衡；當然，相對安全嘅做法就梗係順勢而行。
恒指熊(50903)，收回價19600點，同現價有約370點差距，即日的話屬中等安全距離，槓桿有約44.72倍，即出我怕你睇完篇文之後個時間都唔係好啱，安全等Slow STC(14,3)上返超買行Swing當然Ok，進取嘅等下指數同保歷加中軸相遇後會唔會推返佢落去。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
