【Now財經台】華潤啤酒(00291)中午出咗業績，收入增長13.6%，純利按年增長逾22%，毛利率更升至45.2%嘅近年新高，主要受惠於啤酒銷量增加、均價上升以及部分包裝費下跌，不過，潤啤股價業績後反而一度急跌，呢份業績收唔收貨？
紅蟻資本投資總監李澤銘認為，潤啤業績唔算差，收入及純利都同市場預期差唔多。佢又話，集團產品較多元化，雖然白酒業務營運時間唔算長，但經營利潤高啤酒業務好多，如果白酒業務規模未來逐步擴大，整體毛利率仍有一定上升空間。
Alan續指，潤啤股價業績後要跌，可能同噚日大升有關，但未知係見底反彈，還是市場之前估計業績會有驚喜，雖然呢份成績表唔差，但亦冇驚喜。另一方面，亦可能同內地零售表現有關，日前出爐嘅7月社會零售銷售僅增長2.5%，低過6月嘅3.1%，而啤酒作為主要消費品都無可避免受消費疲弱影響。
