【Now財經台】建設銀行(00939)、交通銀行(03328)、招商銀行(03968)上周末陸續公布中期業績，交行、建行純利按年增長3至4%，招行更多賺9%。
博威環球證券金融首席分析師聶振邦認為，以內地上半年經濟增長逾5.5%作指標，3隻內銀股中，得招行嘅賺錢能力算係突出，加上銀行嘅淨利息收入、息差等業績表現按年大致平穩，所以股價今日有支持，雖然出現少許回套壓力，仍無阻股價向上，反映市場滿意業績。不過，佢話內銀下半年業績走向仲存在好大變數，關鍵因素係內地全年經濟增長係咪維持到中央目標5%。
淨利息收入方面，建行、交行分別跌逾1%及3%，僅招行按年升1.2%。聶Sir指，雖然招行暫時跑贏同業，但市場預期人民銀行為咗撐內房，或會透過下調貸款市場報價利率(LPR)令按揭利率繼續下行，因此，下半年內銀淨息差有機會進一步收窄而影響收入。
