【now.com財經】仲以為噚日指數又會被條窄窄嘅保歷加通道夾到收市，誰不知下半場忽然拓闊將指數向下推低之後，就變得愈跌愈有，最後仲差啲以低位收市，不過同低位收都分別不大。收市後再睇多次個日線圖，嗰條50天線阻力味濃。
應該係前晚瞓得衰，噚日已經Feel到成個右邊背脊硬晒，今日都仲係咁，一擰轉身諗住睇下我家肥貓去咗邊，痛到「呀~」咗出嚟；算啦，專心等開市啦。今朝U盤時見啲股價升跌參半，ADR預視港股跌5點；及至完U後見指數開市報18405點，跌51點。玩咩！18,400至18,499點嘅牛證，死得仲快過30分鐘已讀不回啦；BTW，日線圖嘅「上升通道」亦已玩完。
同作戰室戰友一早講好咗預18,400至18,499點嘅牛證會全數死亡，但留意到小時圖同日線圖都似有啲線可能比到位指數做支持。例如係日線圖嘅10線(9點38分見18315點)，同埋小時圖嘅100線(18,303點)，換言之，暫時預計最多比多層18,300至18,399點嘅牛證佢食，呢兩層夾埋都有成1,316張期指架。
反正開咗個牛熊證街貨圖，再睇埋落去見18,200至18,299點嘅牛證其實已經係重貨區，呢度有相當於70張期指，文章寫到呢度，時間為9點46分，指數跌幅擴大至失埋18,300點，作戰室一早Set好今日淡倉第一注目標18,300點已經抵壘，戰友紛紛開牌食餬。
比多次個小時圖，保歷加通道口已經見到有啲拓闊，平均線計目前被50/100線夾住，望望鐘仲有9分鐘先到10點，恒指熊(53660)，今日新上市，收回價見18,700點，同現價有約400點距離，槓桿約有42倍，真係夠做Day Trade之餘爬格仔亦都可以。如果指數連小時圖100線都確認失守的話，咁就借小時圖保歷加通道口拓闊比佢向下瀡落去啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
