【now.com財經】噚日喺【輪證下半Part】揀咗隻恒指熊(54806)出嚟，千叮萬囑叫見五分鐘圖上指數第四次唔過中軸先好出動。
按噚日喺Patreon出文時間為1點32分，如常用10分鐘作為睇文時間的話，即1點42分時再睇返恒指走勢圖，喺五分鐘圖上見指數已經上過中軸以上水平，但由於保歷加通道本身唔闊，所以喺1點45分見指數喺保歷加頂線出咗爭三點「平頂」，同時保歷加通道口唔拓闊之下，將指數同Slow STC(14,3)重新向下推返落去，等到2點15分終於都再見到指數重返中軸以下水平，(54806)出動的話，最多都只係爬下格仔，以2點15分起計如常用10分鐘作為買貨時間的話，即2點15分至2點25分期間，(54806)高低位做過0.036元/0.035元，平均入場價為0.0355元。
落場後無耐，指數重新落到下半場做出嘅低位，不過同步見保歷加通道口拓闊，換言之即係有位比指數再向下行，一落，17,500點穿都算，點都估唔到連17,400至17,499點嗰層牛證都無埋，17,500至17,599點呢層肥牛都食得耐，好似法蘭西菜咁食足幾個鐘，但係17,400至17,499點呢層，就好似細路食雪糕咁，兩個回會就吞咗杯新地。
去到大約3點半左右，指數低位見過17,379點出咗下影線後回返上去後，喺五分鐘圖遇上10線未見上破，再望望隻(54806)，當時證價有0.043元/0.042元左右，最高見過0.047元。去到3點40分，見指數同Slow STC(14,3)開始出返Swing觸底，仲踩過上10線，(54806)唔過夜亦可以選擇走人，如常以10分鐘作為走貨時間的話，即3點40分至3點50分期間，(54806)高低位做過0.042元/0.041元，呢次平均隊跟報6格或16.9%。
隔晚見美股因為摩通話有機會加息至7厘所以全線冧晒，不過今朝恒指都仲有5點開升，及至開市後指數出現「大陽燭」攀到上17,588點(截至依家9點48分見)嘅高位，算是有個頭仔過一過之前17,571點嘅「雙底」線；今朝未開市時都喺作戰室Mark住呢個位，事關喺小時圖上噚日最後一個鐘留底咗「錘頭」，比多條小時圖10線睇位，So far都未破到。
明白長假期將至，知道星期五(29日)開始無北水，記得聽日(28日)係期指+季結同夜晚約咗中學同學食飯，但見到小時圖嘅「錘頭」真係好想比注耐少少嘅好倉。等到依家10點，指數喺臨過10點前高衝多一下上返17,600點樓上後，連帶小時圖10線都企得返上去。
弱市中大膽少少，恒指牛(62975)，收市價17,168點，槓桿約32.47倍夠做Day Trade，就博一博佢小時圖踩得住10線(所以以此做量度線)而睇下望唔望到20線。依家10點6分，五分鐘圖Slow STC(14,3)上到超買水平，進取嘅回一回氣等佢踩唔踩得住10線有得再上先至出；否則如常用返Swing Trade去做算啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，努力賺取我家肥貓罐罐。
作戰室免費試用，詳見專頁：https://bit.ly/3uixP4Y
