【Now財經台】手機設備股今日(11日)升幅顯著，當中以丘鈦科技(01478)升勢最凌厲，一度飆逾28%，高見4.05元，值得留意係，有大戶喺約兩個月前，將19%丘鈦股份存入中央結算系統(CCASS)，並全數轉入滙豐倉位，如果以持股量推斷，估計呢個大戶係丘鈦大股東，係咪要小心股價大幅炒上後，大股東隨時有動作？
元宇證券基金投資總監林嘉麒指，丘鈦大股東持股量近64%，有任何行動股價都會好敏感，佢又指，今日丘鈦爆升可能同市值細及貨乾，加上依家市場資金比較緊張，一旦呢類中小型公司股價異動，大股東或會有資本動作，繼而影響股價，因此，投資者近期要小心呢類股份。
KK又提醒，一旦見到股價明顯異動，或曾經喺CCASS轉過倉，建議盡量不要沾手呢啲股份。
