【Now財經台】餐飲股連日捱沽，九毛九(09922)見逾3年半低位，午後好淡爭持。九毛九最新公布，斥資1.99億元人民幣收購太二餐飲3.24%嘅股權，以作價計市盈率(PE)大約26倍。其實九毛九兩年前都做過類似操作，當時斥資3億元人民幣增持3%太二股權，當時相當於PE有69.7倍。
耀才證券研究部總監植耀輝指出，太二呢兩年經營模式改善，估值雖然今時唔同往日。但太二面對行業競爭大，加上翻座率由2018年的4.9次，跌至今年上半年3.1次，反映餐飲行業嘅消費增速放慢，所以能解釋到太二作價比兩年前低。
Stanley續指，九毛九今年嘅現金流只有9.27億元人民幣，遠低於兩年前嘅逾23億元人民幣，加上今年其他大筆嘅投資，現金運用可能就會差啲，佢提醒，投資者要留意九毛九之後會唔會再進一步收購。
