【Now財經台】中國旺旺(00151)中午派咗成績表，中期多賺8.5%至逾17億人仔，收入增長4%，毛利率升至逾45%，不過，旺旺股價午後一度跌近2%，其後收復部分失地。
華盛證券財富管理部董事李偉傑指，旺旺業績靚仔，反映集團執行能力強，雖然包裝成本下降，但原材料成本上升，其中，明膠及白砂糖升幅較大，今年3月至5月喺極端天氣下，以白砂糖價格升得最多，撇除呢個因素，近期白砂糖價格顯著回落，日後生產成本嘅毛利率有機會提升。
旺旺上半年海外市場收入錄雙位數增長，其中，亞洲及美洲收入增速顯著，集團會否拓展海外市場？Jason就話，越南生產成本持續下降，加上地理及運輸非常便利，若集團主打東南亞市場，喺越南設廠會更有優勢。此外，美洲收入亦為市場帶來驚喜，預期海外市場會將成為集團盈利貢獻嘅主要來源。
