【now.com財經】經過指數噚日裂口低開之後，以保持高低位最多只有93點嘅幅度嚟完成一日嘅市，真係唔容易。悶足一日過後，今早恒指微升26點，開市報16,673點，呢口價係靠近熊證街貨，之不過今日街貨圖見牛證都出到上16,500至16,599點，同時牛證街貨仍然比熊證嘅多，咁樣秤嘅係，似係向下落去搵多街貨嘅牛證，只不過可能速度同幅度同噚日表現出嚟嘅都差唔多；同步日線圖20線似乎亦要back test多一次。
到正式開市後，指數首段時間爬返上五分鐘圖50線以上水平，本以為阿市可以結束兩日嘅跌勢，不過喺9點50分左右，見指數向下落兼失守16,600點呢個位，雖然未對牛證造成大型傷亡，但對第一層牛證街貨已經開始帶來威脅，作戰室亦早已開出淡倉，呢注淡倉都唔夠薑太大注，事關落場嗰一刻信心都未有好大，只係博30分鐘圖恒指唔過中軸而出，極短線目標只係用小時圖條100線。
望望鐘到10點6分，恒指跌幅有見拓闊至跌92點，低見16,554點，目標為本，小時圖100線已到亦有戰友報喜，雖然格數唔多，但見到大家正數落袋，已經好滿足。
至於呢度，如常用返小時圖去睇，如前文所指指數落到100線，不過暫時仲未見到穿過條100線，Slow STC(14.3)兩線已經處於超賣水平，唯留意保歷加通道目前見為整條向下，開始增加指數同Slow STC(14.3)出觸底嘅機會，呢啲位出淡倉的確有難度，除非指數向下穿過條100線啦。
所以，兩手準備，過100線嘅恒指熊(65086)，收回價16,967點，同現價比只係得350點距離左右，槓桿有約40.52倍擺到明係即日嘢；但如果踩得住100線又觸發到Slow STC(14.3)觸底嘅話，恒指牛(63680)，收回價16,238點，同現價有370點距離，槓桿有約35.35倍，都真係唔近得去邊，所以都係Day Trade嘢。
至於噚日手痕揀嘅冷門嘢蘋果(AAPL.US)嘅Put(10043)，目前證價同噚日都係做緊0.045元，而睇返噚晚蘋果再落多少少，跌1.39%。但留意盤後已經出返0.022%升幅，同時日線圖上見股價暫時有150線作支持，Slow STC914.3)兩線已經落到超賣水平，不過保歷加通道仍然拓闊中，講明呢啲冷門嘢都係玩小注，小注在手嘅話，即管博埋佢條150線硬啲，定係保歷加通道口拓闊強啲啦。
作者阿珊，以技術分析專心玩輪證，唔貪心，努力賺取我家肥貓罐罐。
