【Now財經台】截至早上11時15分止，1小時內《彭博》用戶搜尋量最多港股，依次為商湯(00020)、國泰航空(00293)、領展房產基金(00823)、美團(03690)及快手(01024)。
科技股今日全軍覆沒，其中，以商湯跌得最甘，由蚊股慘變毫子股，其實之前集團創辦人離世已令投資者信心大減，商湯股價2024年開局至今已累跌逾18%，大幅跑輸大市，暫時似乎都睇唔到有任何股價催化劑，可以帶動股價反彈。
資深證券分析師彭偉新指，首先要定義返「反彈催化劑」，除非接到好大嘅定單，或有知名投資者入股，令商湯發展回到正軌，做返市場好有期望嘅人工智能(AI)業務，咁股價就可以大幅反彈。相反，如果冇夠份量嘅好消息，股價都較難回升。
佢又話，1隻股份嘅升跌關鍵一般在於管理層，要有能力令市場相信佢哋可以順利執行公司嘅計劃，但商湯其中1位創辦人已經離世，市場仍未見到集團未來嘅發展路向，所以股價一定會跌咗落去。
