【Now財經台】截至早上11時15分止，1小時內《彭博》用戶關注度上升最多全球股票，依次為舜宇光學(02382)、中國神華(01088)、中國恒大(03333)、安踏體育(02020)及吉利汽車(00175)。
舜宇係半日表現最差藍籌，集團受手機攝像模組規格配備降級拖累發盈警，預期去年最多少賺55%，雖然市場都預咗舜宇會賺少咗，但股價仍愈跌愈多，仲插穿埋6年半低位。摩根大通預估計，今年智能手機市場需求復甦，但係咪彌補唔到手機攝像模組規格配備降級影響？有「最強蘋果分析師」之稱，天風國際證券分析師郭明錤睇淡iPhone出貨量係咪踩多腳？
大華繼顯執行董事梁偉源指，手機攝像模組規格配備降級及iPhone出貨量被睇淡，都係舜宇股價大跌嘅「死因」，雖然舜宇下半年賺多咗，但睇到第4季復甦情況差過預期，尤其係貴價手機，令盈警數字同市場預期落差更大。
Steven又指，由於手機售價低過預期，導致毛利受壓，加上內地經濟前景唔樂觀，貴價手機需求今年會較少，因此，即使今年較去年有改善，改善程度亦唔會太大，如果iPhone 16銷售唔算強勁，將會喺舜宇另一個打擊。
