【now.com財經】話說帶咗四年嘅眼鏡，鏡片終於都花咗(我都唔係好知點解同幾時花)，唯有去返平時嘅眼鏡鋪配返副鏡，順隨驗埋眼啦，所有嘢都健康正常，包括眼壓、眼水、視網膜、黃斑點、血管等，唯獨是...多咗100度老花...唉...「人人都會有架，唔關你本身有無近視事架」視光師哥哥補充，100度只係代表老花嘅開始，通常上到150至250度左右就會停，所以暫時可以唔需要處理佢住；同時亦同我700幾度近視真係無關係。
學方東昇話齋：只有歲月先至可以催人，如果你今日同班後生嘅講：當年股王係思捷(00330)、利豐同會德豐係(00494)同(00020)，仲有隻和黃係(00013)，怕且都無人識得應機。或者唯一大家都仲可以溝通到嘅係，恒指個點數都係咁上下，記得05、06年初畢業入行時，恒指點數同依家都係差唔多；翻查大圖，06年7月打後恒指已經超越依家水平，同年12月迫近20,000點，及至07年高位恒指首次觸及第三個10,000點，高見31,958點，氣氛同依家係完全唔同。
恒指今早完U升66點，開市報16,222點，見五分鐘圖指數同Slow STC(14.3)出晒觸底，同步見指數擺位靠近熊證街貨，本以為指數會繼續向上殺熊，誰不知一開市出支極長上影線再變成大陰燭，向下倒跌過後，嚟到依家10點58分，恒指跌幅重新收窄至一度跌不足1點，chok到呢...頸都斷。
終於都到10點，恒指今朝開市首半個鐘見指數於小時圖上被10同20線卡住，嚟到依家10點7分，指數都仲係被呢兩條線卡住，唉，開始有啲擔心指數被呢兩條線夾住，動彈不得之下都係等指數被線夾完先至再算。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
