【now.com財經】相信已經有唔少香港投資者都會買下美股，股王Nvidia(NVDA.US)隔晚升成16%有多，仲要佢本身股價唔係細，由674.72美元一彈就彈到上785.38美元，技術上見股價借日線圖踩好中軸再裂口比出彈到上保歷加通道頂線，唯由於保歷加通道口被佢一彈都推到拓闊，再加上Slow STC(14.3)兩線重新再指向超買方向，睇下今晚仲有無After Taste啦。
美股隔晚亦見大幅抽升，拉高到道指同標指齊齊再創新高；今朝返嚟見港股，先跌88點開市，不過喺9點半打後，指數都有出低開高走，半個鐘唔駛指數見日內高位16,895點，迫住16,900點關口水平，作戰室第一注好倉開出亦快來快去之下，先係爬咗幾格然後收割先。
小時圖上其實噚日已經重新行咗一個「小圓底」出嚟，收市口價剛好頂住頸線位，而今日本以為西升就會東降啦，誰不知一開出就彈高上去破「小圓底」頸線，少少可惜嘅係指數迫近16,900點之後無以為繼，10點未到升幅一度收窄至得返20幾點，還好五分鐘圖上見10線有支持，重新托住指數升幅。
換個日線圖出嚟見，目前日線圖上見100線為16,167點，而噚日同前日指數喺呢條線前出「平頂」，今日高位一度上過But到依家都只係出咗上影線，數值上雖然依家見指數喺100線之上，希望呢個樣可以維持落去啦。
再拎埋個週線圖出嚟睇，20週線見16,703點，點數上喺依家10點17分都見指數可以企得到喺20週線之上，如上，希望今日嘅收市價可以企得到喺呢條線之上，至少都比返大家少少希望啦。
再睇返五分鐘圖，見指數喺依家10點18分時，喺平衡中嘅保歷加通道之內，同Slow STC(14.3)一齊出觸頂向下，見過線亦喺作戰室比出做淡訊號，至於喺呢個專欄睇嘅你，如常我哋用返小時圖，淡倉出到借返小時圖10線作為下望目標，由於小時圖上嘅保歷加通道都係保持平衡中，所以都Alert住指數同Slow STC(14.3)兩線出觸頂向下。
兩手準備，10線有支持的話，恒指牛(50148)，收回價16,328點，同現價有約480點距離，槓桿為市場上最高，有約30.56倍，街貨亦屬偏低。
相反，一旦失線的話，恒指熊(61822)，收回價17,150點，同現價有約370點距離，槓桿有約35.7倍，都可以做到Day Trade架。
作者阿珊，以技術分析專心玩輪證，唔貪心，努力賺取我家肥貓罐罐。
Patreon作戰室免費試用：https://www.patreon.com/join/cbbcwar
