【Now財經台】截至早上11時止，1小時內《彭博》用戶關注度上升最多首5隻港股，依次為聯想集團(00992)、新奧能源(02688)、萬科企業(02202)、中國海外發展(00688)、快手(01024)。
聯想昨日(22日)中午放榜後，股價收市升逾3%，但最少有4家券商隨即下調目標價，股份今朝要輕微低開，更一度急挫9%至8.02元。
大華繼顯執行董事梁偉源相信，唔少分析師聽完噚日下午嘅分析員會議後，對集團嘅業務指引唔太樂觀，預期今季(2024財年第4季)收入表現會較預期差唔少，因為企業用戶等人工智能個人電腦(AI PC)同其他顛覆性產品推出後先落單，而下季(2025財年第1季)都會未必出現明顯盈利增長，所以決定下調聯想2025財年嘅全年盈利預測，繼而輕微下調目標價。
Steven續指，生產零件成本上升將繼續為集團毛利率帶來壓力，不過，佢認為，股價跌至現水平有一定吸引力，後市要留意下周一至周四(26至29日)舉行嘅世界移動通訊大會(MWC)，聯想推出嘅AI PC等新產品有冇特別功能、定價又如何。
