【Now財經台】回顧2月高息股排行榜，首5位依次為龍源電力(00916)、中國海洋石油(00883)、恒基地產(00012)、周大福(01929)、中銀香港(02388)，2月埋單時，有唔少高息股升超過10%。
安泓投資總監兼香港大學房地產及建設系客席副教授楊書健以全球唔同股市嘅市盈率(PE)分析，港股方面，如果將本地股及H股分開睇，前者其實唔算太平，PE約15倍，除咗地產股受樓市影響外，其他如公用股長揸幾年都未必會蝕。睇返各主要股市PE，當中以內地股票最平，之後就係新加坡，反觀美國、台灣、日本等股市，同本身長期平均比較都貴，香港本地股及英國就屬於合理水平。
佢又話，以日股為例，依家日經平均指數創新高，近日Yen開始回升，因為日本央行政策或有變，喺呢個情況下，國際投資者一定會諗換馬，依家最平係A股及新加坡股市，所以都有機會換馬至呢啲市場。
