【Now財經台】截至早上11時止，1小時內《彭博》全球用戶關注度上升最多首5隻港股，依次為中國海外發展(00688)、華潤置地(01109)、舜宇光學(02382)、中國神華(01088)、嘉里建設(00683)。
舜宇出咗業績，整體毛利率差過預期，末期息又派少一半，富瑞指，集團手機攝像模組均價及毛利率齊受壓，直指業務表現遠差過預期，舜宇股價今朝(21日)先升後回，係咪受業績拖累？
註冊財務策劃師協會會長黃敏碩指，不論睇行業發展或市場競爭，舜宇前景都唔樂觀，早前，對手大立光公布嘅收入指引較為樂觀，有分析估計，大立光可能搶走咗舜宇定單，所以市場對舜宇嘅前景睇法更審慎。
至於舜宇未來發展，黃敏碩指出，集團係採取「兩條腿走路」嘅策略，不單發展智能手機攝像模組，亦希望透過提升科技水平配合電動車嘅趨勢，呢方面嘅開支比例會持續擴大，因此，不論增量、存量、市場競爭力3方面，舜宇都存在變數，業績表現有可能進一步轉差，所以股價就要受壓。
