【now.com財經】噚日喺呢個欄度完全無出倉，但喺作戰室就用咗兩個鐘左右嘅時間持有淡倉去換格仔，主要係博小時圖指數上到堆平均線前唔過兼出「圓頂」向下回落。係無咁痴線諗住佢可以一口氣回到落去上個星期五(3月22日)小時圖上嘅「平底」位，亦即係「圓頂」頸線水平，只要方向正確咁就得啦。
今朝依然都係咁熱，望望新聞置頂嗰行嘅天熱，最高溫度有成31度，4月都未到...玩嘢麼？
但似乎恒指今日都好「Hot」，指數完U後開升74點，到正式開市後飆高高，剛剛開咗市五分鐘見高位16,651點，呢口價已經將指數重新打返上小時圖嗰堆平均線之上。至於企唔企得穩，就要等10點鐘之後，喺小時圖上生多粒燭先知。
八掛下第二樣嘢，向來都知市場上間發行商專係出以美股為Underlying嘅窩輪，呢期加開咗一個新嘅文章喺Patreon【開市前速報】，先發現原來佢再推多一隻新嘅Underlying出嚟，就係美股老散至愛嘅Nvidia(NVDA)，今日見Call/Put各有兩隻。見到發行商咁努力出新產品以吸引投資者的確有啲「感動」；可惜依家呢個世代要買港股以外嘅產品一啲都唔難，有槓桿嘅仲要係大把，以目前呢四隻Call/Put嘅條款，先唔睇其他，單係價外個%，認真，吸引力有限。
終於到10點，睇返恒指小時圖有咩update，見於中軸前出上影線，唔過線向下再落仲要無咗條10線，作戰室今朝開市後五分鐘出嘅淡倉都見有戰友慢慢收網，望望鐘依家10點9分，恒指最低見16481點，同今朝開市裂口底部16,476點只係爭5點，雖然呢一刻恒指跌幅有見減少，或者關鍵又重新落返喺小時圖條10線之上。
恒指牛(651790)，收回價16,200點，同現價有約330點距離進取少少，取其槓桿約38.46倍做一下Swing Trade，借小時圖畫出嚟嘅「三角形」，踩好底線+10線而出，因為槓桿夠高，所以借到20線應該已經可以買張遠啲嘅機票，下個星期復活節假外遊；踩唔實嘅話咪留港去睇發光蛋囉。
作者阿珊，以技術分析專心玩輪證，唔貪心，努力賺取我家肥貓罐罐。
Patreon新增內容，七日免費試用：https://www.patreon.com/join/cbbcwar
