【Now財經台】滙豐控股(00005)中午派咗首季成績表，稅前利潤及淨息差(NIM)都好過預期，季息連特別息合共派31美仙，集團又宣布5月會啟動新一輪，最多30億美元嘅股份回購計劃，喺多項利好消息帶動下，滙控股價午後拗腰升，一度升穿67元，衝上逾3年高位。
此外，出任集團行政總裁近5年嘅祈耀年(Noel Quinn)，突然表示有意退任，令市場大感意外，佢任內帶領集團走出疫情低谷，期間滙控股價累升30%，大幅跑贏同期跌35%嘅恒生指數。
華盛證券財富管理部董事李偉傑指，祈耀年會留任到有繼任人選為止，估計新CEO較大機會在內部挑選，過去數年，滙控出售多項海外非核心業務，相信繼任人會延續祈耀年嘅政策及發展方向，業務方面會繼續側重大中華區，相信股價唔會出現大震盪。
Jason又指，市場關注嘅內地房地產業務風險可控，首季商業房地產信貸損失準備2.51億美元，同去年第4季差唔多，估計之後亦唔會再急升。
