【Now財經台】雖然理想汽車(02015)首4個月交付量升35%，但相對於全年銷售目標80萬輛，依家只完成咗逾13%，龍頭比亞迪股份(01211)表現較好，依家已完成銷售目標26%，現時各大車企交付量增長似乎仍要靠折扣催谷，但需求仍未明顯復甦，理想早前更要下調首季銷售目標，係咪意味比亞迪及理想等，好大機會要調低全年銷售目標？中央不斷出招力谷汽車消費，其中，上海都開始實施新一輪汽車以舊換新補貼，同埋太陽能車置換補貼政策，對車市嘅提振作用有幾大？
艾德金融執行董事陳政深指，以比亞迪為例，全年銷售目標360萬輛，截至4月止，銷量已近94萬輛，情況唔算太悲觀，所以暫時唔使擔心會下調全年目標，但要留意公司會唔會為谷銷量犧牲盈利，始終比亞迪每輛車只賺約6000人仔，要留意銷量會唔會令盈利受壓，政策方面，單靠補貼或貸款便利未必可以刺激需求，雖然短期會有一定效果，但長線而言，隨著市場逐漸飽和，下半年開始行業將會汰弱留強，但有品牌效應嘅車企如比亞迪，仍可以靠海外市場推動發展，佢又估計，汽車行業將會兩極化。
