【Now財經台】截至早上11時止，1小時內《彭博》用戶關注度上升最多港股，依次為中金公司(03908)、碧桂園(02007)、吉利汽車(00175)、中國海洋石油(00883)、美高梅中國(02282)。
A股今日假後復市，券商股普遍靠穩，不過，市傳中金部分高級銀行家或要降職減人工，更有員工可能失去董事總經理嘅頭銜兼降級，早前已有傳佢地投行員工要減薪25%，依家又傳出連職銜都要降，係咪反映生意仍然難做，前景唔樂觀？
富昌證券聯席董事譚朗蔚指，降職或減人工意味行業中長線發展仍未完全樂觀，雖然中資券商上周有炒作，但長遠而言，券商發展始終要睇市況，雖然成交回升，但唔足以支持各項開支，始終本港及內地IPO市場未真正回暖，股估唔算理想，集資亦唔容易，直接影響中金或中信証券(06030)等，因此，中金嘅中長線發展暫時唔可以睇得太樂觀。
