【Now財經台】截至早上11時止，1小時內《彭博》搜尋量最多首5隻港股，依次為融創中國(01918)、ASMPT(00522)、中遠海控(01919)、亞洲水泥(00743)、舜宇光學科技(02382)。
融創股價半日大跌10%，今朝(6日)一度低見1.31元，集團昨日(5日)收市後公布，5月合同銷售按年大跌逾70%至逾22億人仔，首5個月累計就跌45%，碧桂園(02007)上月銷售亦按年大跌76%，不過，有國資背景嘅綠城中國(03900)按年增長近27%。值得留意係，彭博中資地產指數自高位回調20%，反映市場正觀望中央嘅救市政策。
椽盛資本投資總監曾永堅指，內地發展商未來仍會係「國進民退」，除民眾對民企內房冇信心外，亦因為部分發展商主力推售嘅樓盤，唔喺位處中央「救市組合拳」政策針對嘅一線核心城市，例如北京、上海、廣州、深圳及杭州。Jaseper又話，「組合拳」政策5月17日出台後，政策成效仍需時反映，未來要留意6月一線城市樓市銷售情況。
