【Now財經台】號稱港股太空概念第一股嘅洲際航天科技(01725)於3年前借殼上市，初期股價曾經由2元「坐火箭」升至50元。不過，公司上市以來連年虧損，如今更於1個半月內兩度以約1元賤價配股撲水，合共淨籌7600萬元來應付一般營運資金，又話每月經營開支要花費上千萬元。
值得留意嘅係，兩次配股條款相似，冇設禁售期，承配人背景都頗神秘。《香港股票財技密碼》作者梁杰文就指出，5月初配股嘅承配人李小飛相隔10日就減持大部份股權，而且係場外交易，因此無從得知買家身分。
Mike又提到幾項耐人尋味嘅消息，董事會內多位政商界名人接連「跳船」後，核數師羅兵咸永道早前決定唔續任，連公司主席文壹川自去年9月起4度減持，持股由約32%降至目前不足28%，似乎對公司前景冇咩信心。
此外，Mike認為，公司去年5月向大行麥格理發行嘅8億元可換股債(CB)可能係另一財技，表面上係幫公司集資，但手法同某些不斷印股份嘅細價股類同，當投資者換股後因為憂慮公司前景而急急掟貨，導致股價拾級而下，公司相關人士就可以通過將股價向下炒而獲利。
