【Now財經台】大家樂集團(00341)今日(17日)中午出咗業績，股價午後由跌轉升，集團全年純利增長近2倍至3.3億元，撇除政府疫情資助，經調整純利大增近3.8倍，不過，去年純利同2019年嘅逾5.8億元仍相差好遠，係成本太高？還是其他原因導致盈利相差一大截？
博威環球證券金融首席分析師聶振邦指，其實主要同工作模式改變有關，疫情後在家工作(work from home)愈來愈普及，原本每星期要返Office返足5日，依家可能只需返3至4日，其他時間就WFH，呢種工作模式會令打工仔外出食飯需求減少，因而影響大家樂嘅純利表現。
聶Sir又指，成本係另一個原因，因為大部分食品供應商都想追返疫情期間，即3年嘅損失，導致大家樂要硬食較高嘅來貨價，利潤無可避免會受損。
佢認為，大家樂應透過增加收入，應對來貨價問題，除咗直接加價，亦可以考慮加入一啲有噱頭嘅食品及新套餐，又或者同其他IP品牌合作，吸引多啲年青人去大家樂食嘢，相信會對提升集團毛利率有幫助。
