【Now財經台】「618電商購物節」發起人京東集團(09618)，股價今日(18日)冇乜睇頭，睇返過往嘅「618」效應，京東股價喺2021及2022年5月中至6月底，分別升約14%及20%，但2023及2024年同期就要跌，係咪反映「618」效應已經消退？
華盛證券財富管理部董事李偉傑指，因為內地政策唔鼓勵盲目消費，同埋消費模式唔同咗，個別內地企業近年亦冇再每日現場公布銷售金額，而內地消費力持續受壓，導致銷售額冇起色，自然無法帶動股價。
京東股價走勢方面，Jason就話，除咗跟大市走，亦因為行業競爭非常激烈，電商行業互相搶奪市場份額，若要提升市佔率，就要向海外市場埋手，銷售才有增長空間。
