【Now財經台】Tesla概念股力勁科技(00558)出咗全年業績，雖然少賺9%，收入及毛利都要跌，但派息增加，帶動股價一度衝高近14%，高見3.64元。雖然集團主要市場內地收入去年下跌，但積極拓展海外市場，業績亦提及「全球化2.0戰略」初見成效，其中，北美洲收入增長近10%，中南美洲更近乎倍升，不過，始終佔比仍然好細，暫時係咪好難靠海外市場帶動整體收入及盈利增長？
信達國際研究部董事趙晞文指，基數的確太低，北美洲、中南美洲及其他國家各自收入都唔夠5億元。集團營運方式亦要跟隨客戶步伐改變，依家唔少車企喺歐洲有業務，車廠造車必需用壓鑄機，睇返地區收入分布，內地佔77.1%，相信呢個比例唔會有好大變化。
晞文又話，力勁股價好難再上，唔排除出完業績後，有機會調低收入及盈利預測，限制了股價收復空間，又估計3.7元至3.8元阻力會較大。
