【Now財經台】一連3日的世界人工智能大會(WAIC)繼續在上海舉行，但多隻人工智能(AI)及機械人概念股已開始「散水」，其中，今日(5日)禁售期結束嘅速騰聚創(02498)股價暴瀉，呢批解禁股涉及逾1816萬股，佔已發行股數4.04%，速騰聚創一度重挫70%，低見15.28元，創新低，其後跌幅輕微收窄，不論跌幅或成交都係上市以來最多，成交股數較過去100日同時段平均飆升逾430倍。
睇返技術走勢，速騰聚創一向冇乜成交，之前納入指數炒市值操作，成交就多返啲，但今日一跌，股價打回原型之餘，仲要跌凸，現價較招股價「深潛」61%，市值縮到唔夠80億元，RSI已經超賣，但暫時都唔係最超賣，因為剛上市時RSI更低，除非解禁股有強者接手，又或者基本因素大逆轉，否則，小心會步商湯(00020)後塵，暫時似乎都不宜沾手。
