【Now財經台】港股近日表現弱勢，恒生指數昨日(8日)挫近300點，跌至兩個半月低位，全日成交縮到唔夠900億元，今朝(9日)開市不久更插穿250天牛熊線，雖然7月開局時表現唔錯，但恒指依家已由升轉跌，雖然今朝開市前，快手(01024)傳出回購消息，擬8月8日至明年5月30日，回購唔超過60億元股份，不過，恒指仍繼續跌，港股後市點睇？
高富金融集團投資總監梁偉民指，回購消息暫時對港股幫助唔大，主要係出現外資明顯流走情況，A股已連續5周有走資情況，6月流走400億美元，暫時係今年最多嘅月份，更拖累港股近期回調。佢又指，恒指4月開始反彈係因為市場對經濟有憧憬，但結果出嚟嘅經濟數據麻麻，同市場預期有落差，導致港股回落。
Wyman續指，恒指暫時仲可以守住100天線，短期相信會有支持，但大市未必可以有個明顯反彈，佢估計，恒指會橫行一段時間，投資者亦要睇實人仔走勢，因為可以左右港股大局。
