【Now財經台】「股神」巴菲特(Warren Buffett)投資旗艦巴郡(Berkshire Hathaway)第2季大減蘋果公司(Apple Inc.)持倉近半，Apple概念股舜宇光學科技(02382)股價今日(5日)一度挫逾4%，低見40.1元，跌至3個月低位。舜宇CALL輪方面，除非揀到好短身，否則，其他CALL槓桿普遍僅2至4倍，條款係咪唔太吸引？
瑞銀亞洲股票衍生產品銷售部李梓維指，其實Apple相對其他納指成分股已經算跌得少，但可能因為舜宇係港股，所以表現差少少。Alvin指，依家市場上嘅舜宇CALL大部分都幾長身，槓桿未必太高，如果純粹博好倉，雖然之前發行商出嘅牛證收回價較遠，但因為舜宇股價回調咗唔少，反而變得近價好多，價外10%嘅牛證，槓桿可達6至7倍，比CALL輪吸引好多，值得考慮。
