【Now財經台】舜宇光學科技(02382)上個月發咗盈喜，預告上半年多賺最多1.5倍，但股價不升反跌，更延續7月中展開嘅跌浪，今日(6日)終於跟隨大市回升，收市升近2%，報40.3元。
舜宇股價由盈喜前高位53元，跌至現水平已累跌逾10元，集團將於8月20日出中期業績，值唔值得提前部署？華盛證券財富管理部董事李偉傑指，舜宇股價自高位回落至今，已形成比較斜嘅下降通道，未來兩星期可唔可以向上突破42元水平嘅通道頂部，就要睇外圍股市會唔會轉勢，同埋集團將於未來一周出爐嘅7月出貨量數據有冇驚喜，否則，或要下試38元水平嘅通道底部。
基本面而言，舜宇6月嘅手機攝像模組出貨量按年大減20%，公司解釋係因為優化產品組合而出少咗低階產品，手機鏡頭出貨量則按年大增近20%。
Jason就話睇好舜宇前景，因為舜宇做開高端手機用嘅鏡頭，唔少內地品牌近兩季都推出旗艦機型，而市傳華為、小米集團(01810)將於下半年推出高階摺機，估計市場對高端前置鏡頭嘅需求將進一步增加，相信可以彌補來自蘋果公司(Apple Inc.)定單減少嘅不確定性。
