【Now財經台】滙豐控股(00005)行政總裁祈耀年(Noel Quinn)9月2日就會退任，艾橋智(Georges Elhedery)同日會接任CEO，祈耀年在位5年期間，滙控開始削減部分環球業務，更專注亞洲業務，並進行大規模架構重組，又成功阻止主要股東中國平安(02318)提出分拆亞洲業務嘅要求，回顧佢5年嚟嘅工作表現，算唔算交到貨？新任CEO又有咩過人之處？
資深銀行家王浵世認為，可以分兩個角度去評價祈耀年嘅工作表現，首先係股東角度，祈耀年表現算唔錯，原因係對股東嚟講，銀行目的當然係股東利益最大化，希望股息及股價能夠向上，過去5年，滙控的確做到平穩向上。其次係客戶角度，客戶關注滙控嘅產品及服務有冇改善，客戶普遍都好滿意。總括而言，祈耀年整體嘅工作表現可以話係功德圓滿。
至於有中東背景嘅艾橋智，王浵世指出，雖然冇同佢共事過，但憑個人經驗，佢認為滙控入面有唔少高層都係來自中東，處事方式普遍都好謹慎，加上對時局十分了解，面對現時多變嘅市況絕對係一個優點。此外，艾橋智係滙控近代唯一識講普通話嘅行政總裁，有助佢了解更多中國文化，唔會忽略一個龐大嘅市場。
