【Now財經台】華潤電力(00836)今日(27日)中午出咗業績，股價午後由跌轉升，升逾4%，曾高見23.1元，中期息有加碼，派息比率維持約23%，期內公司現金多咗1倍，理論上有能力支持派更多息，全年派息係咪值得憧憬？
華盛證券財富管理部董事李偉傑指，全年派息係可以憧憬，不過，雖然潤電現金多咗，但負債都好重，所以即使係長期債務，公司都會考慮返呢個情況，加上潤電去年11月都派過特別息，全年派息係可以期待，但未必年年都派高息。
股價方面，人工智能(AI)用電量未必可以利好內地電企，因為呢類公司主要受惠於煤電容量電價機制提升，股價喺業績後市場反應正面，短期仍有動力挑戰24元至25元水平。
